హర్మూజ్ జలసంధిలో కొత్త టెన్షన్.. ఇంటర్నెట్ కేబుళ్లపై ఇరాన్ హెచ్చరిక!

పశ్చిమాసియాలో ఉద్రిక్తతలు కొనసాగుతున్న నేపథ్యంలో ఇరాన్ అనుకూల మీడియా నుంచి ఒక కొత్త హెచ్చరిక వెలువడింది. గల్ఫ్ ప్రాంతంలో తదుపరి సంక్షోభం చమురు రవాణా మార్గాల్లో కాకుండా, సముద్ర గర్భంలో ఉన్న ఇంటర్నెట్ కేబుళ్ల ద్వారా రావచ్చని పరోక్షంగా సూచించింది. ఈ పరిణామం గల్ఫ్ దేశాల్లో తీవ్ర ఆందోళన రేకెత్తిస్తోంది.

ఇరాన్‌కు చెందిన తస్నిమ్ న్యూస్ ఏజెన్సీ విడుదల చేసిన ఒక నివేదిక హర్మూజ్ జలసంధిలోని సముద్రగర్భ డేటా కేబుళ్ల బలహీనతను ఎత్తి చూపింది. "ప్రమాదవశాత్తు లేదా ఉద్దేశపూర్వకంగానైనా ఒకేసారి అనేక ప్రధాన కేబుళ్లకు నష్టం జరిగితే, పర్షియన్ గల్ఫ్ వ్యాప్తంగా తీవ్ర అంతరాయాలు ఏర్పడతాయి" అని ఆ నివేదిక హెచ్చరించింది. హర్మూజ్ జలసంధి ఇప్పటికే ప్రపంచ ఇంధన సరఫరాకు కీలక మార్గంగా ఉండగా, ఇప్పుడు డిజిటల్ మౌలిక వసతులకు కూడా అంతే కీలకమైన ప్రాంతంగా మారిందని పేర్కొంది.

ఫాల్కన్ (FALCON), ఏఏఈ-1 (AAE-1), సీ-మీ-వీ (SEA-ME-WE) వంటి అనేక ప్రధాన సబ్‌మెరైన్ కేబుల్ సిస్టమ్‌లు ఈ జలసంధి నుంచే వెళ్తున్నాయి. యూఏఈ, ఖతార్, బహ్రెయిన్, కువైట్, సౌదీ అరేబియా వంటి దేశాలు బ్యాంకింగ్, కమ్యూనికేషన్స్, క్లౌడ్ సేవల కోసం ఈ కేబుళ్లపైనే అధికంగా ఆధారపడి ఉన్నాయి.

ఈ హెచ్చరికలకు బలం చేకూరుస్తూ 2024, 2025లో ఎర్ర సముద్రంలో కొన్ని కేబుళ్లు దెబ్బతిన్న ఘటనలను నివేదిక ప్రస్తావించింది. అప్పట్లో ఆ ప్రాంతంలో నెలకొన్న ఉద్రిక్తతల కారణంగా మరమ్మతులకు నెలల సమయం పట్టింది. యెమెన్‌లోని హౌతీ తిరుగుబాటుదారులు కూడా గతంలో ఇలాంటి మౌలిక వసతులను లక్ష్యంగా చేసుకుంటామని బెదిరించారు. ఈ నివేదిక కేవలం ఓ అంచనా కాదని, గల్ఫ్ దేశాలకు ఇరాన్ పంపుతున్న వ్యూహాత్మక సంకేతమని అంతర్జాతీయ విశ్లేషకులు భావిస్తున్నారు. ప్రస్తుతానికి ప్రత్యక్ష ముప్పు లేనప్పటికీ, ఈ హెచ్చరికతో కంటికి కనిపించని కీలకమైన డిజిటల్ మౌలిక వసతుల భద్రతపై ఆందోళనలు మొదలయ్యాయి.